Prologo
_______________
Bilyong taon na ang nakararaan mula nang mabuo ang malawak na kalupaan sa daigdig. Ang malawak na kalupaan na Pandyiya ay unti-unting nagpirapiraso sa mga naipapaliwanag at di-maipaliwanag na mga kaganapan sa ilalim at ibabaw ng mundo. Mula dito ay nabuo ang apat na bahagi ng mundo—Amerika, Euroasya, Aprika at Antartika. Ang mga iba pang pirasong lupain ay tinatawag ng mga isla. At isa na dito ang Isla ng mga Nagiligan.
Halos isang senturya na ang lumipas nang mapag-alaman ang lihim tungkol sa kanyang sumpa. Ang sumpa ay isang abstrak na bagay na hindi maipaliwanag kung bakit nagaganap. Karaniwang nagsisimula ang sumpa sa tagas ng dugo nguni sa katunayan ay gawa lamang ito ng di-mapigilang kathang isip ng isang katauhan. Upang malaman ang nakakubling kasaysayan ng isang kinahinatnan, ang tanging paraan lamang ay ang pagwasak sa sumpa. At ang katotohanan, walang may batid kung papaano. Iyon ang sumpa.
Ayon sa kayang isipin ng tao, ang pinakamatalinghagang sumpa sa buhay ay kung papaano nagkaroon ng buhay sa buong kabuntalaan. Isipin kung paano nagkaroon ng buhay ang tao, hayop at halaman. binubuo sila ng mga selyo at kung paano nagkaroon ng selyo ay isang palaisipan. Nguni sa islang ito, ang palaisipan ay kung paano nagsimula ang sumpa. Iyon ang pinakanakapagtataka.
Pula ang bumuhay sa serpente.
_____________________________________
Tungkol sa'n ba ang "Si Francois de Ville At Ang Sumpa ng Serpenteng Muwebles"?
Ang kuwentong ito, na kasunod ng Pulang Mata sa Seoul Street, ay isang salaysay sa mga magkakaibigang Francois de Ville, Morphus Hegonus, Jean Stealglass, Isidore Clein at Zefire Pyranne. Ang kuwento ay umiikot sa isang misteryosong lumang diyaryo na napulot ni Morphus sa isang kalye na mula sa isang uugod-ugod nang matanda.
Ang pahayagang ito pala ay naglalaman ng isang insidenteng di dapat nangyari kung hindi sa isang malagim na balak. Ito ay nagdala sa isang kapahamakan na patungo sa pagsisisi. Sa bandang huli nabunyag ang sumpa at dito rin nalaman ang may pakana ng lahat ng ito.
_____________________________________
Ang kuwentong ito ay nahahati sa limang bahagi:
- Sa Juvenile Avenue
- Ang Lumang Pahayagan
- Liham at Panagrama
- Dilim ng Isang Panaginip
- Ang Sumpa ng Serpente
_____________________________________
Mula sa 'Sa Juvenile Avenue':
"Habang naglalakad ang dalawa tungo sa kung saan man, nagkatinginan silang dalawa nang di inaasahan. Nagpatuloy sa paglalakad ang matanda. Gayundin ang lalaki. Nang malapit nang magkasalubong ang dalawa, may napansin ang lalaki na nahulog mula sa kamay ng matanda. Hindi naman ito napansin ng may hawak. Tila mga papel ang nahulog, at tama nga, papel ang mga ito nang pinulot ng lalaki. Mga lumang dyaryo lang naman pala ang mga ito. Nguni nais pa rin itong ibalik ng lalaki sa matanda na siyang nagmamay-ari. Baka kasi may kahalagahan ito sa kanya. Malay niya, baka may sulatin siyang naiambag sa ika-13 pahina nito o kaya naman ay isang sanaysay sa kolum na ‘What You Read Is Yours’."
Mula sa 'Ang Lumang Pahayagan':
"“Ah iyang pahayagan ba? Wala ‘yan, napulot ko lang kanina ‘yan nung naglalakad ako sa Juvenile Avenue,” paliwanag ni pareng Morphus,” lumang dyaryong lang iyan na nahulog ng isang matandang babae.”
“Halata nga eh…” sabad ni pareng Zef habang binubuklat ang pahayagan, “luma nga talaga ito. Disyembre 13, 1920 pa lang eh.”
“Ang luma naman. Mag-iisang siglo na ang dyaryong ‘yan. Next year, 100 years old na ang dyaryo. Ba’t hindi mo ibinalik sa matanda, malay mo kolektor siya ng mga lumang dyaryo o may ala-ala siyang naiwan d’on. Baka kailangan niya iyan,” sabi naman ni Jean.
“Hindi ko na rin maibalik kasi biglang naglaho ‘yung matanda,” ani pareng Morphus, “naku, h’wag niyo nang alalahanin ‘yang dyaryo, basta ang mahalaga, pasok na si Franc.”
“Oo nga naman,” tugon naman ni Clein.
Disyembre 13, 1920…matagal na nga. Disyembre 6, 2019 na ngayon, nasabi ko sa aking isipan. Ang nakapagtataka nga lang ay kung papaano nagtagal ang dyaryong ‘yan at isa pa, kung bakit ito dala ng isang matandang babae. Nagmistulang enigma ang naturang pahayagan sa aking isipan. Maaaring may nais ipabatid ang pahayagang iyan.Nabasag ang aking pagdadalumat nang binasa na ni pareng Zef ang ‘ngalan ng dyaryo at ang headline nung araw na iyon—ikalabintatlo ng Disyembre, sampung siglo siyamnapu’t dalawang dekada."
Mula sa 'Liham at Panagrama':
6 Disyembre 2019
Le Demour, Harbor Town
Ewan ko ba kung kelangan ko pa bang batiin ka ng bon soir sa kadahilanang ginulantang ko ang iyong kahimbingan sa pusikit na dilim. Nagsisilipana na ang mga bituin sa iyong paningin: alam ko iyon. Ang tanging hiling ko lamang ay sana dumalo ka sa vacation trip sa GIS. Eksayting ‘yun. Hindi ba’t gusto mo ring pasyalan ang lugar na iyon?
Naku, sasama ka rin at ‘lam ko ‘yon. Basta lang ba magpaalam ka kay Tita Mael.
Paalala: sa Diyembre 13 na iyon.
SSSee, ala tlg jan
PS: Pack my red box with five dozen quality jugs.
Mula sa 'Dilim ng Isang Panaginip':
"Hindi pa nasiyahan ang matanda at pinagsasaksak pa niya ang binata sa iba’t ibang bahagi ng katawan: balikat, braso, hita, dibdib, t’yan, at mukha. Nagmistulang dinuguan ang binata sa kagagawan ng isang demonyo—na tulad ng kinupas nang lipunan—ay hinayaan na lamang nakatiwangwang sa baku-bakung daan ng kalye. Nag-samyong dugo and dalin kung sa’n humandusay ang kanyang katawan. Ang pumatay ay humayo na."
_________________________________________________
